ທ່ານ ນາຍົກລັດຖະມົນຕີ ຕ້ອນຮັບການນຳກະຊວງອຸດສາຫະກຳ ແລະ ການຄ້າ ຫວຽດນາມ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອັງຄານ, 12 ມ.ສ 2022 11:00

​            

ໃນຕອນແລງ ວັນທີ 11 ເມສາ 2022 ທີ່ ສຳນັກງານນາຍົກລັດຖະມົນຕີ, ທ່ານ ພັນຄຳ ວິພາວັນ, ນາຍົກລັດ ຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງທ່ານ ຫງວຽນ ຮົງ ຢຽນ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ແຫ່ງ ສສ ຫວຽດນາມ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຄື່ອນໄຫວວຽກທາງການ ຢູ່ ສປປ ລາວ ໃນລະຫວ່າງວັນທີ 8-12 ເມສາ 2022.
ໃນໂອກາດນີ້, ທ່ານ ພັນຄຳ ວິພາວັນ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການເດີນທາງມາຢ້ຽມຢາມ ແລະ ເຄື່ອນໄຫວເຮັດວຽກ ຮ່ວມກັບກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ໃນຄັ້ງນີ້, ເຊິ່ງເປັນການປະກອບສ່ວນ ເຂົ້າໃນການຮັດແໜ້ນຄວາມສາມັກຄີ ແລະ ເພີ່ມພູນຄູນສ້າງ ສາຍພົວພັນສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ຈະເລີນງອກງາມ ແລະ ເກີດດອກອອກຜົນບໍ່ຢຸດຢັ້ງ ເວົ້າລວມ, ເວົ້າສະເພາະ ກໍ່ແມ່ນການພົວພັນຮ່ວມມື ຂອງສອງກະຊວງອຸດສາຫະກຳ ແລະ ການຄ້າ ລາວ ແລະ ຫວຽດນາມ ໃຫ້ກ້າວສູ່ລວງເລິກ ແລະ ເກີດໝາກຜົນ ເປັນຮູບປະທຳຕົວຈິງຫຼາຍຂຶ້ນ, ທັງເປັນການປະກອບສ່ວນ ເຂົ້າໃນການປະຕິບັດກິດຈະກຳ ສະເຫຼີມສະຫຼອງ ສອງວັນປະຫວັດສາດຂອງສອງຊາດ ລາວ-ຫວຽດນາມ ຄື: ວັນສ້າງຕັ້ງສາຍພົວພັນການທູດ ລະຫວ່າງ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ໃຫ້ມີຄວາມໝາຍສຳຄັນ, ເລິກເຊິ່ງ ແລະ ເປັນຂະ ບວນການຟົດຟື້ນ. ພ້ອມກັນນີ້ ກໍ່ໄດ້ຕີລາຄາສູງ ຕໍ່ໝາກຜົນໃນການເຮັດວຽກຮ່ວມກັນ ລະຫວ່າງ ກະຊວງອຸດສາຫະ ກຳ ແລະ ການຄ້າ ແຫ່ງ ສປປ ລາວ ກັບກະຊວງອຸດສາຫະກຳ ແລະ ການຄ້າ ແຫ່ງ ສສ ຫວຽດນາມ ໃນຄັ້ງນີ້ ໂດຍສະເພາະ ສາມາດກຳແໜ້ນ ແລະ ຜັນຂະຫຍາຍ ແນວທາງການເມືອງ ຂອງສອງພັກ-ສອງລັດ ລາວ ແລະ ຫວຽດນາມ ຢ່າງຖືກຕ້ອງ ແລະ ມີໝາກມີຜົນຕົວຈິງ. ນອກຈາກນັ້ນ, ທ່ານຍັງໄດ້ສະແດງຄວາມເຫັນດີເປັນເອກະພາບ ໃຫ້ກະຊວງອຸດສາຫະກຳ ແລະ ການຄ້າ ຂອງ ສປປ ລາວ ແລະ ສສ ຫວຽດນາມ ສືບຕໍ່ພົວພັນຮ່ວມມືກັນ ພັດທະນາວຽກງານການຄ້າ ແລະ ປັບປຸງແກ້ໄຂ ຂອດທີ່ຍັງເຫັນວ່າ ບໍ່ທັນໂລ່ງລ່ຽນ ເພື່ອເຮັດໃຫ້ມູນຄ່າການຮ່ວມມືທາງດ້ານການຄ້າ ຂອງສອງປະເທດເພີ່ມຂຶ້ນຫຼາຍກວ່າເກົ່າ ໂດຍເນັ້ນໜັກ ໃຫ້ມີແຜນການຮ່ວມມືທີ່ລະອຽດ, ຈະແຈ້ງ, ມີຈຸດສຸມ, ສອດຄ່ອງກັບຄວາມຮຽກຮ້ອງຕ້ອງການ ໃນການພັດທະນາ ແລະ ເຄື່ອນໄຫວວຽກງານຕົວຈິງ ຂອງແຕ່ລະປະເທດ ຢ່າງມີປະສິດທິພາບ ແລະ ປະສິດທິຜົນ; ຊຸກຍູ້ສົ່ງເສີມ ນັກທຸລະກິດ ລາວ ແລະ ຫວຽດນາມ ສາມັກຄີຮ່ວມມືກັນ ບົນພື້ນຖານຄວາມຈິງໃຈ, ຊ່ວຍເຫຼືອເຊິ່ງກັນ ແລະ ກັນ, ຕ່າງຝ່າຍ ຕ່າງມີຜົນປະໂຫຍດ; ພ້ອມກັນຊຸກຍູ້ ແລະ ພັດທະນາໂຄງລ່າງພື້ນຖານ ສຳລັບຮັບໃຊ້ວຽກງານການຄ້າ ຂອງສອງປະເທດ ໂດຍສະເພາະ ເສັ້ນທາງຂົນສົ່ງແລກປ່ຽນສິນຄ້າ, ທາງດ່ວນ, ທາງລົດໄຟ, ທ່າເຮືອ ແລະ ອື່ນໆ; ການຮ່ວມມືກັນ ໃນຕໍ່ໜ້າ ໃຫ້ເອົາໃຈໃສ່ ຕໍ່ການພົວພັນປະສານງານ ໃນວຽກງານການຄ້າ ໃຫ້ກົມກຽວກັນກວ່າເກົ່າ ໂດຍສະເພາະ ຂະບວນການຜະລິດສິນຄ້າ, ການຂົນສົ່ງສິນຄ້າ, ການຈໍາໜ່າຍ ກໍ່ຄືຕະຫຼາດຮອງຮັບສິນຄ້າ, ຄວາມຕ້ອງການສິນຄ້າ, ລາຄາສິນຄ້າ ແລະ ອື່ນໆ.
                                          
ໃນໂອກາດດຽວກັນ, ທ່ານ ຫງວຽນ ຮົງ ຢຽນ ກໍ່ໄດ້ສະແດງຄວາມຂອງໃຈ ຢ່າງຈິງໃຈ ຕໍ່ການໃຫ້ກຽດຕ້ອນຮັບ  ອັນອົບອຸ່ນ ຂອງທ່ານນາຍົກລັດຖະມົນຕີ ພ້ອມດ້ວຍພາກສ່ວນກ່ຽວຂ້ອງ ຂອງ ສປປ ລາວ, ພ້ອມທັງ ແຈ້ງໃຫ້ທ່ານ ນາຍົກ ລັດຖະມົນຕີ ຊາບ ກ່ຽວກັບຈຸດປະສົງ ແລະ ຜົນສຳເລັດເບື້ອງຕົ້ນ ຂອງການເດີນທາງມາຢ້ຽມຢາມ ແລະ ເຄື່ອນໄຫວເຮັດວຽກ ຮ່ວມກັບກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ໃນຄັ້ງ. ນອກຈາກນັ້ນ ກໍ່ຍັງໄດ້ກ່າວຄຳອວຍພອນອັນດີງາມ ໃນໂອກາດປີໃໝ່ລາວ ພສ 2565 ໃຫ້ແກ່ທ່ານ ນາຍົກລັດຖະມົນຕີ ແລະ ຜ່ານທ່ານນາຍົກລັດຖະມົນຕີ ໄປຍັງປະຊາຊົນລາວບັນດາເຜົ່າ ຕື່ມອີກ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ