ຜົນກອງປະຊຸມໃຫຍ່ ອົງຄະນະພັກກະຊວງແຜນການ ແລະ ການລົງທຶນ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນສຸກ, 30 ຕ.ລ 2020 14:00

​​ກອງປະຊຸມໃຫຍ່ຜູ້ແທນອົງຄະນະພັກ ກະຊວງແຜນການ ແລະ ການລົງທຶນ ຄັ້ງທີ IV ໄດ້ໄຂຂຶ້ນໃນຕອນເຊົ້າວັນທີ 29 ແລະ ອັດລົງໃນຕອນເຊົ້າ ວັນທີ 30 ຕຸລາ 2020 ດ້ວຍຜົນສຳເລັດຢ່າງຈົບງາມ, ໂດຍການເປັນປະທານ ຂອງສະຫາຍ ສອນໄຊ ສີພັນດອນ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ເລຂາຄະນະພັກ, ລັດຖະມົນຕີກະຊວງແຜນການ ແລະ ການລົງທຶນ; ໃຫ້ກຽດເຂົ້າຮ່ວມ ແລະ ໂອ້ລົມຕໍ່ກອງປະຊຸມ ຂອງສະຫາຍ ທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະມົນຕີ; ມີຜູ້ແທນສົມບູນ ຈຳນວນ 201 ສະຫາຍ ຍິງ 65 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກ ທົ່ວກະຊວງແຜນການ ແລະ ການລົງທຶນ 353​ ສະຫາຍ ເຂົ້າຮ່ວມ.


ກອງປະຊຸມຄັ້ງນີ້, ໄດ້ພ້ອມກັນສຸມໃສ່ພິຈາລະນາ ແລະ ຮັບຮອງເອົາ ຮ່າງລາຍ​ງານການເມືອງ, ບົດສຳຫຼວດການນຳພາ ຂອງຄະນະບໍລິຫານງານພັກກະຊວງ ສະໄໝທີ III, ທິດທາງໜ້າທີ່ ແລະ ຄາດໝາຍສູ້ຊົນໃນ 5 ປີຕໍ່ໜ້າ ເພື່ອສ້າງພື້ນຖານອັນໜັກແໜ້ນ ປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມຂອງຊາດ ໃຫ້ຮັ່ງມີເຂັ້ມແຂງ.


ກອງປະຊຸມ ໄດ້ເປັນເອກະສັນຢ່າງສົມບູນ ເລືອກເອົາ ສະຫາຍ ສອນໄຊ ສີພັນດອນ ເປັນເລຂາຄະນະບໍລິຫານງານພັກ ກະຊວງແຜນການ ແລະ ການລົງທຶນ (ຊຸດໃໝ່), ສະຫາຍ ນາງ ຄໍາຈັນ ວົງແສນບູນ ເປັນຮອງເລຂາຄະນະພັກ ແລະ ສະຫາຍ ກິແກ້ວ ຈັນທະບູລີ ເປັນປະທານກວດກາພັກ; ໄດ້ເລືອກເອົາຜູ້ແທນສົມບູນ ເພື່ອຈະໄປເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ຈໍານວນ 6 ສະຫາຍ, ສໍາຮອງງ 2 ສະຫາຍ, ຊຶ່ງບັນດາສະຫາຍທີ່ໄດ້ຮັບການເລືອກຕັ້ງຄັ້ງນີ້ ລ້ວນແຕ່ໄດ້ຜ່ານການທົດສອບຝຶກຝົນຫຼໍ່ຫຼອມ ຈາກຂະບວນການຕົວຈິງ, ເປັນຜູ້ທີ່ມີຄວາມຕັ້ງໜ້າຫ້າວຫັນໃນພາລະກິດປົກປັກຮັກສາ, ສ້າງສາພັດທະນາປະເທດຊາດ ຕາມແນວທາງການປ່ຽນແປງໃໝ່ຂອງພັກ, ໄດ້ເປັນແບບຢ່າງທີ່ດີ ແລະ ໄດ້ຮັບຄວາມໄວ້ເນື້ອເຊື່ອໃຈ ຈາກຖັນແຖວພະນັກງານ, ສະມາຊິກພັກ, ເຮັດໃຫ້ການຊີ້ນຳ-ນໍາພາໃນຂົງເຂດວຽກງານແຜນການ ແລະ ການລົງທຶນ ຂອງພັກ-ລັດຖະບານ ດຳເນີນໄປຢ່າງຖືກຕ້ອງ ແລະ ຍາດໄດ້ຜົນສຳເລັດ ສູງຂຶ້ນເປັນກ້າວໆ.


ໂອກາດນີ້, ສະຫາຍ ທອງລຸນ ສີສຸລິດ ຕາງໜ້າໃຫ້ຄະນະບໍລິຫານງານສູນກາງພັກ ແລະ ລັດຖະບານ ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໄຊຊະນະ ທີ່ຄະນະພັກ, ຄະນະນໍາ ແລະ ສະມາຊິກພັກ, ພະນັກງານ-ລັດຖະກອນ ກະຊວງແຜນການ ແລະ ການລົງທຶນ ຍາດມາໄດ້ຕະຫຼອດໄລຍະ 5 ປີຜ່ານມາ. ເພື່ອເປັນເຂັມຊີ້ທິດເຍືອງທາງເຂົ້າໃນຂະບວນການຈັດຕັ້ງປະຕິບັດວຽກງານຂະແໜງແຜນການ ແລະ ການລົງທຶນ, ສະຫາຍ ໄດ້ເນັ້ນໃຫ້ຄະນະພັກຊຸດໃໝ່ ຕ້ອງຕັດສິນໃຈປັບປຸງ, ປ່ຽນແປງ ແລະ ປະຕິຮູບວຽກງານ ຂອງຂະແໜງແຜນການ ແລະ ການລົງທຶນ ໃຫ້ເລິກເຊິ່ງເຖິງຖອງ; ແບ່ງວຽກ, ແບ່ງໜ້າທີ່, ມອບວຽກ, ມອບຄວາມຮັບຜິດຊອບ ໃຫ້ແຕ່ລະສະຫາຍ ຢ່າງຈະແຈ້ງ, ຕິດຕາມ, ຊີ້ນຳ ການປະຕິບັດໜ້າທີ່ ຄວາມຮັບຜິດຊອບຕາມວຽກງານ, ພາລະບົດບາດ ທີ່ໄດ້ຖືກມອບໝາຍ, ແກ້ໄຂບັນຫາຕ່າງໆຢ່າງຖືກຕ້ອງ, ທັນການ; ຫັນວຽກງານ ໄປສູ່ວິທີເຮັດວຽກ, ວິຖີຊີວິດໃໝ່ ດ້ວຍການປະຢັດ, ມີລະບຽບວິໄນ, ໂປ່ງໃສ, ແຂ່ງຂັນບໍລິການຮັບໃຊ້ປະຊາຊົນ, ແຂ່ງຂັນກັນສ້າງຄວາມດີ, ແຂ່ງຂັນກັນເປັນແບບຢ່າງ ໃຫ້ພະນັກງານ, ປະຊາຊົນ ແລະ ສັງຄົມ, ລວມທັງ ສ້າງພາບພົດທີ່ດີ ໃຫ້ຕ່າງປະເທດມີຄວາມເຊື່ອໝັ້ນ ແລະ ນັບຖື, ໄປພ້ອມໆກັບການຢືດໝັ້ນແບບແຜນວິທີເຮັດວຽກ ຕາມຫຼັກການລວມສູນປະຊາທິປະໄຕ, ສາມັກຄີ ເປັນປຶກແຜນ, ກ້າສະເໜີ, ກ້າເຮັດ, ກ້າຮັບຜິດຊອບ, ກ້າຕຳນິຕົນເອງ ແລະ ກໍ່ສ້າງເຊິ່ງກັນ ແລະ ກັນ.


ນອກນີ້, ສະຫຍາຍ ທອງລຸນ ສີສຸລິດ ຍັງໄດ້ສະແດງຄວາມເຊື່ອໝັ້ນວ່າ: ດ້ວຍມູນເຊື້ອອັນດີງາມ ທີ່ບັນດາສະຫາຍ ສາມາດຍາດມາໄດ້, ຄະນະພັກ ກໍຄືສະມາຊິກພັກ-ພະນັກງານ ທຸກສະຫາຍ ຈະສາມາດສືບຕໍ່ອອກແຮງເພີ່ມພູນຄູນສ້າງສິ່ງດີງາມ ໃຫ້ເພີ່ມທະວີຂຶ້ນເລື້ອຍໆ, ບຸກບືນຫ້າວຫັນປະຕິບັດວຽກງານ ທີ່ໄດ້ວາງອອກໃນມະຕິກອງປະຊຸມໃຫຍ່ ຄັ້ງນີ້ ປະກົດຜົນເປັນຈິງ, ເຮັດໃຫ້ພາຍໃນກະຊວງ ມີຄວາມໜັກແໜ້ນທາງດ້ານການເມືອງ, ເຂັ້ມແຂງທາງດ້ານການຈັດຕັ້ງ, ປະຕິບັດສຳເລັດໜ້າທີ່ການເມືອງ ທີ່ພັກ -ລັດມອບໝາຍໃຫ້, ປະກອບສ່ວນເຮັດໃຫ້ການບໍລິຫານຂອງລັດຖະບານ ແລະ ປະເທດເຮົາ ໄດ້ຮັບການພັດທະນາດ້ວຍບາດກ້າວທີ່ໜັກແໜ້ນ, ເຂັ້ມແຂງ ໄປຕາມທິດສີຂຽວ, ຍືນຍົງ, ປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ ແລະ ສີວິໄລ ທັນສະໄໝໃນອະນາຄົດ.


ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ