ທ່ານຮອງນາຍົກລັດຖະມົນຕີ ເຄື່ອນໄຫວເຮັດວຽກ ຢູ່ແຂວງຫຼວງນໍ້າທາ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນພະຫັດ, 20 ສ.ຫ 2020 10:00

​​ໃນລະຫວ່າງວັນທີ 19-20 ສິງຫາ 2020 ທ່ານ ບຸນທອງ ຈິດມະນີ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ຫົວໜ້າຄະນະຊີ້ນໍາ ໂຄງການກໍ່ສ້າງທາງລົດໄຟລາວ-ຈີນ  ພ້ອມດ້ວຍຄະນະ ໄດ້ເຄື່ອນໄຫວເຮັດວຽກ ຢູ່ແຂວງ ຫຼວງນໍ້າທາ, ມີທ່ານ ບຸນຈັນ ສິນທະວົງ, ລັດຖະມົນຕີກະຊວງໂຍທາທິການ ແລະ ຂົນສົ່ງ, ຮອງຫົວໜ້າ, ຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ (ຜູ້ປະຈໍາການ) ຮ່ວມເຄື່ອນໄຫວ; ໂດຍໄດ້ຮັບການຕ້ອນຮັບຈາກຄະນະນຳແຂວງຫຼວງນໍ້າທາ, ຄະນະຮັບຜິດຊອບໂຄງການກໍ່ສ້າງທາງລົດໄຟລາວ-ຈີນ ແລະ ພະນັກງານທີ່ກ່ຽວຂ້ອງ ເຂົ້າຮ່ວມເຮັດວຽກນໍາ. 

ທ່ານ ຄໍາໄຫຼ ສີປະເສີດ, ເລຂາພັກແຂວງໆຫຼວງນໍ້າທາ ໄດ້ລາຍງານສະພາບການພັດທະນາເສດຖະກິດ-ສັງຄົມຂອງແຂວງ, ສະພາບການ ເຝົ້າລະວັງ ແລະ ປ້ອງກັນການແຜ່ລະບາດຂອງພະຍາດ COVID 19 ຢູ່ແຂວງຫຼວງນໍ້າທາ ໃຫ້ທ່ານຮອງນາຍົກ ແລະ ຄະນະຊາບ. ໃນໄລຍະຜ່ານມາ ເສດຖະກິດຂອງແຂວງ ໄດ້ຂະຫຍາຍຕົວຢ່າງຕໍ່ເນື່ອງ,  ຂົງເຂດວັດທະນະທໍາ-ສັງຄົມ ໄດ້ຮັບການບູລະນະ, ວຽກງານປ້ອງກັນຊາດ-ປ້ອງກັນຄວາມສະຫງົບ ໄດ້ຫັນເປັນຂອງທົ່ວປວງຊົນຮອບດ້ານ, ຫັນພະນັກງານລົງກໍ່ສ້າງຮາກຖານຢູ່ຊົນນະບົດ, ຊີວິດການເປັນຢູ່ຂອງປະຊາຊົນ, ທະຫານ, ຕໍາຫຼວດ ໄດ້ຮັບການປັບປຸງ ຍົກລະດັບໃຫ້ດີຂຶ້ນເປັນກ້າວໆ, ຄວາມທຸກຍາກໄດ້ຫຼດລົງ. ໃນໄລຍະ 6 ເດືອນຕົ້ນປີ 2020 ເສດຖະກິດແຂວງ ແມ່ນພົບຄວາມຫຍຸ້ງຍາກ ແລະ ບໍ່ສາມາດບັນລຸຕາມແຜນການທີ່ວາງໄວ້ ເນື່ອງຈາກການລະບາດຂອງພະຍາດ COVID-19.
ໂອກາດນີ້, ທ່ານ ບຸນທອງ ຈິດມະນີ ໄດ້ໃຫ້ກຽດໂອ້ລົມຕໍ່ການນໍາຂອງແຂວງ, ໂດຍໄດ້ເນັ້ນໜັກໃຫ້ພ້ອມກັນຂຸ້ນຂ້ຽວເຊື່ອມຊຶມ ແລະ ຜັນຂະຫຍາຍຜົນສໍາເລັດ ຂອງກອງປະຊຸມໃຫຍ່ຂອງອົງຄະນະພັແຂວງ, ເມືອງ ແລະ ບັນດາຂະແໜງການຂອງແຂວງໃຫ້ທົ່ວປວງຊົນ ແລະ ຂະແໜງການຕ່າງໆຮັບຮູ້ ແລະ ພ້ອມກັນຈັດຕັ້ງປະຕິບັດ; ຮີບຮ້ອນຜັນຂະຫຍາຍ ບັນດາຄາດໝາຍທີ່ກໍານົດໄວ້ ຢູ່ໃນມະຕິກອງປະຊົມໃຫຍ່ອົງຄະນະພັກແຂວງ ຄັ້ງທີ VIII ກ່ຽວກັບ ການພັດທະນາເສດຖະກິດຂອງແຂວງ ໂດຍຫັນເປັນອັນລະອຽດ ຂອງຂະແໜງການ ຂອງພາກສ່ວນຕ່າງໆ,  ເອົາໃຈໃສ່ເປັນພິເສດ ໃນການຊຸກຍູ້ການຜະລິດເປັນສິນຄ້າຂອງປະຊາຊົນ ຕິດພັນກັບການສົ່ງເສີມທຸລະກິດຂະໜາດນ້ອຍ, ຂະໜາດກາງ; ເອົາໃຈໃສ່ການແກ້ໄຂຄວາມທຸກຍາກຂອງປະຊາຊົນ ໂດຍການຈັດສັນທີ່ຢູ່ອາໄສ, ຈັດສັນອາຊີບໃຫ້ປະຊາຊົນ ຢ່າງເໝາະສົມ, ສ້າງວຽກເຮັດງານທໍາໃຫ້ເຂົາເຈົ້າ; ແກ້ໄຂບັນຫາປະກົດການຕ່າງ ທີ່ເກີດຂຶ້ນໃນສັງຄົມໃຫ້ຫຼຸດນ້ອຍຖອຍລົງ; ພິເສດໃນໄລຍະນີ້ ແມ່ນໃຫ້ເອົາໃຈໃສ່ການເຝົ້າລະວັງ ແລະ ປ້ອງກັນການແຜ່ລະບາດຂອງເຊື້ອພະຍາດ COVID-19 ຕາມການແນະນໍາຂອງຄະນະສະເພາະກິດ; ສືບຕໍ່ໃນການປະຕິບັດວຽກງານ 3 ສ້າງຢູ່ແຕ່ລະເມືອງ, ແຕ່ລະບ້ານ ຕາມມາດຖານຕ່າງໆທີ່ກໍານົດໄວ້, ຢາກເຮັດໄດ້ຕ້ອງມີການແບ່ງສິດແບ່ງຄວາມຮັບຜິດຊອບໃຫ້ແຕ່ລະຂັ້ນໃຫ້ເໝາະສົມ; ສືບຕໍ່ປັບປຸງພາຍໃນພັກໃຫ້ເຂັ້ມແຂງ, ແບ່ງງານແບ່ງຄວາມຮັບຜິດຊອບ ໃຫ້ເໝາະສົມຕາມແຕ່ລະຂົງເຂດວຽກງານ, ປັບປຸງລະບອບລະບຽບການເຮັດວຽກຂອງອົງຄະນະພັກໃຫ້ແທດເໝາະ,ເພີ່ມທະວີການຕິດຕາມ, ກວດກາພາຍໃນພັກໃຫ້ເຂັ້ມແຂງ; ຕ້ອງເພີ່ມຄວາມສາມັກຄີພາຍໃນອົງຄະນະພັກແຂວງ ເພື່ອເປັນຫຼັກແຫຼ່ງເປັນບ່ອນອີງ ໃນການເຕົ້າໂຮມຄວາມສາມັກຄີທົ່ວອົງຄະນະພັກ ທົ່ວປວງຊົນບັນດາເຜົ່າ ໃຫ້ເປັນປຶກແຜ່ນ ເພື່ອພ້ອມກັນພັດທະນາແຂວງ ໃຫ້ຈະເລີນກ້າວໜ້າຕໍ່ໄປ.
ໃນໂອກາດດຽວກັນ, ທ່ານຮອງນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ ການກໍ່ສ້າງທາງລົດໄຟລາວ-ຈີນ ຢູ່ຈຸດສະຖານີນາເຕີຍ, ສະຖານີບໍ່ເຕ່ນ ແລະ ການຈັດສັນບ່ອນຢູ່ໃໝ່ ໃຫ້ປະຊາຊົນ ຜູ້ທີ່ໄດ້ຮັບຜົນກະທົບຈາກການກໍ່ສ້າງທາງລົດໄຟລາວ-ຈີນ ຢູ່ຈຸດບ້ານນາເຕີຍ. ສໍາລັບການກໍ່ສ້າງທາງ ລົດໄຟລາວ-ຈີນ ຊ່ວງຜ່ານແຂວງຫຼວງນໍ້າທາ ມາຮອດປະຈຸບັນແມ່ນພວມຢູ່ໃນໄລຍະອອກແບບສະຖານີ ບໍ່ເຕ່ນ ແລະ ສະຖານີນາເຕີຍ ເພື່ອໃຫ້ແທດເໝາະກັບສະພາບຕົວຈິງ ແລະ ສາມາດຮອງຮັບການພັດທະນາ ທີ່ຈະມີຂຶ້ນ ໃນອະນາຄົດ, ສາມາດກາຍເປັນຈຸດສູນກາງໃນການເຊື່ອມຈອດ ລະຫວ່າງ ສປ ຈີນ ກັບພາກພື້ນອາຊຽນ ແລະ ສາກົນ; ປະຈຸບັນ ຄະນະຮັບຜິດຊອບ ພວມເລັ່ງດໍາເນີນການປຶກສາຫາລື ຕົກລົງເອົາຮູບແບບສະຖານີ, ບຸກເບີກເນື້ອທີ່ ທີ່ນອນຢູ່ໃນໂຄງການ ແລະ ເລັ່ງດໍາເນີນການທາງດ້ານເອກະສານ ເພື່ອນໍາເອົາຊ່ຽວຊານຈາກຕ່າງປະເທດ ເຂົ້າມາດໍາເນີນການກໍ່ສ້າງ, ຄາດວ່າ ຈະສາມາດລົງມືການກໍ່ສ້າງທັງສອງສະຖານີ ໃນໄວໆນີ້ ແລະ ໃຫ້ສໍາເລັດໃນເດືອນກັນຍາ ປີ 2021.
​ພ້ອມກັນນັ້ນ, ທ່ານ ບຸນທອງ ຈິດມະນີ ພ້ອມດ້ວຍຄະນະ ກໍ່ໄດ້ເຄື່ອນໄຫວ ຢ້ຽມຢາມໂຄງການກໍ່ສ້າງ ດ່ານຜ່ານລົດຂົນສົ່ງສິນຄ້າສາກົນບໍ່ເຕ່ນ ທີ່ສ້າງຂຶ້ນໃໝ່ ເພື່ອຮອງຮັບການຂົນສົ່ງສິນຄ້າ ຈໍານວນ ມະຫາສານ ລະຫວ່າງສອງປະເທດ ລາວ-ຈີນ ຊຶ່ງສໍຳເລັດການກໍ່ສ້າງເມື່ອບໍ່ດົນມານີ້ ແລະ ຈະເປີດໃຫ້ລົດຂົນສົ່ງສິນຄ້າ ສາມາດຜ່ານໄປ-ມາໄດ້ ຫຼັງຈາກການກໍ່ສ້າງຂອງເບື້ອງຊາຍແດນຈີນສໍາເລັດ; ຢ້ຽມຢາມເຂດເສດຖະກິດພິເສດບໍເຕ່ນແດນງາມ ທີ່ຕັ້ງຢູ່ໃກ້ກັບດ່ານສາກົນບໍ່ເຕ່ນ ແລະ ຖືເປັນເປັນສູນລວມທາງດ້ານເສດຖະກິດ, ການເງິນ, ການລົງທຶນແຫ່ງໃໝ່ ຂອງລາວໃນອະນາຄົດ ທີ່ລົງທຶນໂດຍນັກລົງທຶນຕ່າງປະເທດ ດ້ວຍຮູບແບບສໍາປະທານ; ຢ້ຽມຊົມໂຮງງານຜະລິດເສື້ອຜ້າແຟຊັນ ຂອງບໍລິສັດ ຟູ້ສິ້ງ ເສື້ອຜ້າແຟຊັນ ລາວຈໍາກັດ ທີ່ເຂົ້າມາລົງທຶນ ຢູ່ໃນເຂດ ເສດຖະກິດພິເສດບໍ່ເຕ່ນແດນງາມ ຕື່ມອີກ.


ແຫຼ່ງ: ຄະນະກວດກາສູນກາງພັກ