ໂຮມຊຸມນຸມສະເຫຼີມສະຫຼອງວັນສື່ມວນຊົນ ແລະ ການພິມຈໍາໜ່າຍລາວ ຄົບຮອບ 70 ປີ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນຈັນ, 17 ສ.ຫ 2020 09:00


ໃນຕອນບ່າຍຂອງວັນທີ 14 ສິງຫາ 2020 ທີ່ຫໍວັດທະນະທໍາແຫ່ງຊາດ, ນະຄອນຫຼວງວຽງຈັນ ໄດ້ຈັດພິທີໂຮມຊຸມນຸມສະເຫຼີມສະຫຼອງວັນສື່ມວນຊົນ ແລະ ການພິມຈໍາໜ່າຍ ຄົບຮອບ 70 ປີ  (13.8.1950-13.8.2020) ໂດຍການໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ, ກໍາມະການກົມການເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວ, ມີບັນດາລັດຖະມົນຕີ-ຮອງລັດຖະມົນຕີ, ພະເຖລະນຸເຖລະ, ບັນດາກົມ, ບັນດາສື່ມວນຊົນ, ພາກສ່ວນພິມຈໍາໜ່າຍທັງພາກລັດ ແລະ ເອກະຊົນ ເຂົ້າຮ່ວມ.
ໃນໂອກາດນີ້ ທ່ານ ກິແກ້ວ ໄຂຄໍາພິທູນ, ເລຂາທິການສູນກາງພັກ, ລັດຖະມົນຕີກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ກ່າວໄຂພິທີຢ່າງເປັນທາງການ ວ່າ: ການຈັດສະເຫຼີມສະຫຼອງ 70 ປີ ແຫ່ງການສ້າງຕັ້ງສື່ມວນຊົນ ແລະ ການພິມຈຳໜ່າຍໃນຄັ້ງນີ້ ເພື່ອທົບທວນຫວນຄືນມູນເຊື້ອອັນສະຫງ່າລາສີແຫ່ງການກໍ່ຕັ້ງ, ເຕີບໃຫຍ່ຂະຫຍາຍຕົວ ທັງໃນດ້ານປະລິມານ ແລະ ຄຸນນະພາບ ຂອງສື່ມວນຊົນ ແລະ ການພິມຈຳໜ່າຍລາວ; ແມ່ນການລະນຶກເຖິງຜົນງານ, ຄຸນງາມຄວາມດີອັນໃຫຍ່ຫຼວງຂອງຜູ້ນຳພັກ-ລັດ, ພະນັກງານ, ນັກຮົມ ແລະ ປະຊາຊົນເຮົາ ເວົ້າລວມ ແລະ ເວົ້າສະເພາະ ແມ່ນນັກຮົບໃນແນວຮົບສື່ມວນຊົນ ແລະ ພິມຈຳໜ່າຍ ທີ່ໄດ້ເສຍສະຫຼະເພື່ອຊາດ ເພື່ອພາລະກິດປະຕິວັດໃນຜ່ານມາ; ເພື່ອສຶກສາອົບຮົມປຸກລະດົມຂະບວນການສ້າງຜົນງານຂ່ຳນັບຮັບຕ້ອນ ກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.
ຫຼັງຈາກນັ້ນ ທ່ານ ສະຫວັນຄອນ ຣາຊມຸນຕີ, ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຂຶ້ນລາຍງານກ່ຽວກັບມູນເຊື້ອ ແລະ ຜົນງານທີ່ພົ້ນເດັ່ນຂອງສື່ມວນຊົນ ແລະ ການພິມຈໍາໜ່າຍລາວ ຕະຫຼອດໄລຍະ 70 ປີ ຜ່ານມາ ຊຶ່ງມີຫຼາຍຜົນງານອັນພົ້ນເດັ່ນ ໃນປະກອບສ່ວນໃນພາລະກິດຕໍ່ສູ້ປົດປ່ອຍຊາດ; ປົກປັກຮັກສາ ແລະ ສ້າງສາພັດທະນາປະເທດຊາດ. ໃນໄລຍະໃໝ່ສື່ມວນຊົນ ແລະ ການພິມຈໍາໜ່າຍລາວຍັງສາມາດຮັກສາບົດບາດ ການເປັນກະບອກສຽງອັນແຫຼມຄົມຂອງພັກ-ລັດ, ເປັນຜູ້ແນະນໍາ, ນໍາພາຫາງສຽງ ແລະ ສ້າງຄວາມເຂົ້າໃຈທີ່ຖືກຕ້ອງ ໂດຍໄດ້ຮັບຄວາມເຊື່ອຖືໃນການສະໜອງຂໍ້ມູນຂ່າວສານ, ສາລະຄວາມຮູ້, ສາລະບັນເທີງໃຫ້ແກ່ເປົ້າໝາຍຂອງຕົນ ພ້ອມທັງ ສາມາດເຊື່ອມຕໍ່ຂໍ້ມູນຂ່າວສານໃນພາກພື້ນ ແລະ ສາກົນ.
ມາຮອດປະຈຸບັນ, ຂົງເຂດສື່ມວນຊົນ: ມີສື່ສິ່ງພິມທັງໝົດ 152 ສະບັບໜັງສືພິມ  33 ສະບັບ, ໃນນັ້ນໜັງສືພິມລາຍວັນ 11 ສະບັບ, ວາລະສານ 115 ສະບັບ ແລະ ໃບຂ່າວ  4 ສະບັບ. ສະຖານີວິທະຍຸກະຈາຍສຽງ ມີ 82 ສະ ຖານີ, ໃນນັ້ນ ຢູ່ສູນກາງ 3 ສະຖານີ ແລະ ທ້ອງຖິ່ນ 79 ສະຖານີ ເພີ່ມຂຶ້ນ 12 ສະຖານີ ເມື່ອທຽບໃສ່ປີ 2016. ການກະຈາຍສຽງທາງພາກພື້ນດິນ ຂອງລະບົບເອເອັມ ແລະ ເອັຟເອັມ ກວມ 90% ຂອງພື້ນທີ່ທົ່ວປະເທດ. ການກະຈາຍຜ່ານດາວທຽມ ແລະ ອິນເຕີເນັດກວມ 100% ຂອງພື້ນທີ່ທົ່ວປະເທດ ແລະ ຫຼາຍປະເທດໃນໂລກ ຊຶ່ງນອກຈາກການກະຈາຍພາກພາສາລາວ, ພາສາຊົນເຜົ່າ ຄື: ພາສາມົ້ງ ແລະ ພາສາກຶມມຸ  ຍັງໄດ້ກະຈາຍເປັນພາສາຕ່າງ ປະເທດ ຄື: ຫວຽດນາມ, ອັງກິດ, ຝຣັ່ງ, ຂະແມ,ຈີນ ແລະ ໄທ.  ສະຖານີໂທລະພາບ ມີ 45 ສະຖານີ, ໃນນັ້ນ ຢູ່ສູນກາງ  6 ສະຖານີ ລວມທັງ ເອກະຊົນ  3 ສະຖານີ, ທ້ອງຖິ່ນ  39 ສະຖານີ, ໃນນັ້ນ ມີໂທລະພາບດິຈິຕອນ 7 ສະຖານີສາມາດແຜ່ພາບທາງພາກພື້ນດິນກວມ 80% ຂອງພື້ນທີ່ທົ່ວປະເທດ. ນອກນັ້ນ, ຍັງມີສະຖານີຖ່າຍທອດໂທລະພາບຫວຽດນາມ VTV4, ສະຖານີຖ່າຍທອດໂທລະພາບ ສປ ຈີນ CCTV4, CCTV News. ສໍາລັບລະບົບໂທລະໂຄ່ງ ໄດ້ຕິດຕັ້ງແລ້ວຈໍານວນ 5.918 ຊຸດໃນ 148 ເມືອງຢູ່ໃນຂອບເຂດທົ່ວປະເທດ. 

ສຳລັບຂົງເຂດການພິມຈຳໜ່າຍ: ປັດຈຸບັນ, ທົ່ວປະເທດມີໂຮງພິມ 84 ແຫ່ງ ຢູ່ສູນກາງ 7 ແຫ່ງ, ຢູ່ທ້ອງຖິ່ນ 77 ແຫ່ງ; ມີສຳນັກພິມ 17 ແຫ່ງ ໃນນີ້ ເປັນຂອງລັດ 2 ແຫ່ງ, ມີບໍລິສັດແປພາສາ 16 ແຫ່ງ, ບໍລິສັດອອກແບບໂຄສະນາ 12 ແຫ່ງ, ຮ້ານຈຳໜ່າຍປຶ້ມ ແລະ ສິ່ງພິມອື່ນ 16 ແຫ່ງ; ມີຫໍສະໝຸດ 99 ແຫ່ງ ແລະ ອື່ນໆ. ພ້ອມນີ້ ທ່ານຍັງໄດ້ຍົກໃຫ້ເຫັນ ສິ່ງທ້າທາຍຂອງວຽກງານສື່ມວນຊົນ ແລະ ການພິມຈໍາໜ່າຍ ທີ່ຕ້ອງໄດ້ສືບຕໍ່ແກ້ໄຂ ໃຫ້ດີຂຶ້ນໃນຕໍ່ຫນ້າຕື່ມອີກ.
ໃນໂອກາດນີ້ ທ່ານ ນາຍົກລັດຖະມົນຕີ ໄດ້ໃຫ້ກຽດໂອ້ລົມ ໂດຍທ່ານໄດ້ສະແດງຄວາມຍ້ອງຍໍຊົມເຊີຍຕໍ່ ວຽກງານສື່ມວນຊົນ ແລະ ການພິມຈໍາໜ່າຍລາວ ທີ່ນັບມື້ນັບເຕີບໃຫຍ່ຂະຫຍາຍຕົວ ແລະ ເປັນປາກກະບອກສຽງ ທີ່ມີຄຸນນະພາບຂອງພັກ ແລະ ລັດຖະບານຕະຫຼອດມາ. ພ້ອມນີ້ ທ່ານໄດ້ເນັ້ນໜັກໃຫ້ຂົງເຂດສື່ມວນຊົນ ແລະ ການພິມຈຳໜ່າຍລາວ ເອົາໃຈໃສ່ປັບປຸງວຽກງານສໍາຄັນຈໍານວນໜຶ່ງ, ສ້າງຄວາມໜ້າເຊື່ອຖື, ໂຄສະນາສະເໜີຂ່າວຢ່າງມີຫຼັກການ, ຖືກຕ້ອງ, ວ່ອງໄວ ແລະ ທັນການ; ພ້ອມທັງ ປັບປຸງຕົນເອງຢູ່ສະເໝີ ໄປຕາມການຂະຫຍາຍຕົວຂອງສັງຄົມ,  ຫັນປ່ຽນທາງຄວາມຄິດ, ວິໄສທັດ, ສ້າງແບບແຜນການເຮັດວຽກແບບໃໝ່ ຕາມການຫັນປ່ຽນວິຖີຊີວິດແບບໃໝ່ (New Normal), ສ້າງມາດຕະຖານໃໝ່ ເພື່ອພ້ອມກັນເຮັດສໍາເລັດໜ້າທີ່ການເມືອງ ກໍຄື ຄວາມຮຽກຮ້ອງຕ້ອງການຂອງການພັດທະນາໃນໄລຍະໃໝ່ ດ້ວຍຄຸນນະພາບໃໝ່ ເພື່ອດຶງດູດຜູ້ຟັງ, ຜູ້ເບິ່ງ ແລະ ຜູ້ອ່ານ ໃຫ້ນັບມື້ຫຼາຍຂຶ້ນກວ່າເກົ່າ. ສໍາຄັນ ທ່ານນາຍົກລັດຖະມົນຕີ ໄດ້ເນັ້ນຕື່ມວ່າ ສື່ມວນຊົນລາວ ຕ້ອງເປັນຜູ້ທີ່ປາກອອກແສງ, ຜູ້ຮູ້ແທງເຖິງໃຈ, ຜູ້ສະດຸ້ງໄວ ເມື່ອໄດ້ອ່ານ, ຜູ້ທີ່ກ້າຜ່ານອຸປະສັກ, ຜູ້ທີ່ຮັກຄວາມຈິງ ແລະ ຜູ້ທີ່ຍິງເຖິງເປົ້າ.
ໃນພິທີສະເຫຼີມສະຫຼອງວັນສື່ມວນຊົນ ແລະ ການພິມຈໍາຫນ່າຍ ຄົບຮອບ 70 ປີ ຄັ້ງນີ້ ຍັງໄດ້ມີການມອບລາງວັນໃຫ້ບັນດາອົງການສື່ມວນຊົນ ແລະ ການພິມຈໍາຫນ່າຍທີ່ມີຜົນງານດີເດັ່ນໃນການປະກອບສ່ວນເຂົ້າໃນການໂຄສະນາ ຕ້ານໄພພິບັດລະດັບຊາດ ໃນໄລຍະຜ່ານມາ ທັງໝົດ 40 ກວ່າພາກສ່ວນ. ນອກຈາກນີ້ ຍັງໄດ້ຈັດງານວາງສະແດງຜົນງານການເຄື່ອນໄຫວ ກໍຄື ຜະລິດຕະພັນດ້ານສື່ມວນຊົນ ແລະ ການພິມຈໍາໜ່າຍ ທັງໝົດ 20 ກວ່າພາກສ່ວນເຂົ້າຮ່ວມວາງສະແດງ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ