ນາຍົກລັດຖະມົນຕີ ຕ້ອນຮັບປະທານສະພາແຫ່ງຊາດຫວຽດນາມ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນສຸກ, 27 ກ.ຍ 2019 11:00

​​​ໂດຍຕອບສະໜອງ ຕາມຄຳເຊີນ ຂອງທ່ານ ນາງ ປານີ ຢາທໍ່ຕູ້, ປະທານສະພາແຫ່ງຊາດ ແຫ່ງ ສປປ ລາວ, ທ່ານ ນາງ ຫງວຽນທິ ກິມເງິນ, ປະທານສະພາແຫ່ງຊາດ ແຫ່ງ ສສ ຫວຽດນາມ ພ້ອມດ້ວຍຄະນະຜູ້ແທນຂັ້ນສູງ ໄດ້ເດີນທາງມາຢ້ຽມຢາມ ທາງລັດຖະກິດ ທີ່ ສປປ ລາວ ແຕ່ວັນທີ 26-29 ກັນຍາ 2019. ເຊິ່ງໃນຕອນບ່າຍ ຂອງວັນທີ 26 ກັນຍາ 2019 ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ກໍ່ໄດ້ໃຫ້ການຕ້ອນຮັບ ຄະນະຜູ້ແທນຂັ້ນສູງດັ່ງກ່າວ ຢ່າງອົບອຸ່ນ.​

ໃນໂອກາດນີ້, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ຢ່າງອົບອຸ່ນ ແລະ ຕີລາຄາສູງຕໍ່ການເດີນ ທາງມາຢ້ຽມຢາມຂອງ ທ່ານ ນາງ ຫງວຽນ ທິກິມ ເງິນ ໃນຄັ້ງນີ້ ເຊິ່ງເປັນການປະກອບສ່ວນສຳຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ກໍ່ຄື ປະຊາຊົນສອງຊາດ ລາວ-ຫວຽດນາມ ທີ່ມີມາແຕ່ດົນນານແລ້ວນັ້ນ ໃຫ້ໄດ້ຮັບການພັດທະນາ ແລະ ແຕກດອກອອກຜົນງອກງາມຍິ່ງໆຂຶ້ນ. ພ້ອມທັງ ສະແດງຄວາມຫວັງວ່າ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຈະສືບຕໍ່ໃຫ້ການສະໜັບສະໜູນ, ຊ່ວຍເຫຼືອເຊິ່ງກັນ  ແລະ ກັນ ຢ່າງສະເໝີຕົ້ນສະເໝີປາຍ ເພື່ອພັດທະນາປະເທດຊາດ ໃຫ້ຈະເລີນຮຸ່ງເຮືອງສີວິໄລ.
ໃນໂອກາດດຽວກັນ, ທ່ານ ນາງ ຫງວຽນ ທິກິມ ເງິນ ກໍ່ໄດ້ສະແດງຄວາມປິຕິຍິນດີ ເປັນຢ່າງຍິ່ງ ແລະ ຮູ້ສຶກເປັນກຽດຢ່າງສູງ  ທີ່ໄດ້ນໍາພາຄະນະຜູ້ແທນຂັ້ນສູງຂອງ ສສ ຫວຽດນາມ ເດີນທາງຢ້ຽມຢາມ ສປປ ລາວ ຢ່າງເປັນທາງການ ເຊິ່ງເປັນດິນແດນ ທີ່ມີຄວາມສວຍສົດງົດງາມ ແລະ ອຸດົມຮັ່ງມີ. ພ້ອມທັງ, ກ່າວຊົມເຊີຍຕໍ່ ພັກ-ລັດຖະບານ ແລະ ປະຊາຊົນລາວ ທີ່ພ້ອມພຽງກັນ ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມສະຫງົບສຸກ, ນັບມື້ມີການພັດທະນາ ແລະ ມີຄວາມຈະເລີນສີວິໄລເປັນກ້າວໆ.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ